Lideri i talibanëve ka urdhëruar zyrtarët që të shkarkojnë djemtë e tyre dhe anëtarët e tjerë të familjes, në një dekret kundër nepotizmit.
Udhëheqësi suprem, Mullah Hibatullah Akhundzada, dha urdhrin që ndalonte të gjithë zyrtarët të punësonin të afërm në postet qeveritare.
Dekreti kërkon gjithashtu që të largohen nga puna edhe të afërmit e tjerë të familjes që tashmë punojnë në administratën e tyre.
“Është një urdhër për të gjithë zyrtarët në ministritë, departamentet dhe autoritetet e pavarura që askush të mos lejohet të emërojë anëtarë të familjes apo të afërm në poste qeveritare”, thuhet në dekretin e postuar në Twitter.
Zyrtarët tani duhet t’i plotësojnë pozitat me njerëz të ndryshëm nga djemtë, të afërmit ose anëtarët e familjes së tyre.
Megjithëse nuk është marrë asnjë arsye zyrtare pas vendimit, kjo vjen pas thashethemeve se zyrtarët talibanë kanë emëruar djemtë dhe të afërmit e tyre në poste të larta qeveritare, në vend të profesionistëve ose atyre me kualifikimet e duhura.
Pas largimit të trupave të NATO-s në gusht 2021, talibanët morën sërish pushtetin në Afganistan.
Pavarësisht premtimeve fillestare për një shtet më të moderuar, interpretimi i ashpër i ligjit islam – të cilin ata e përdorën gjatë sundimit të tyre të mëparshëm nga viti 1996 deri në 2001 – është rikthyer gradualisht.
Vajzave aktualisht u ndalohet shkolla përtej moshës 12 vjeç dhe grave u ndalohet të punojnë, të studiojnë dhe të udhëtojnë pa një shoqërues mashkull, si dhe të shkojnë në parqe, palestra ose banja.
Ata gjithashtu duhet të mbulohen nga koka deri te këmbët dhe nuk mund të punojnë në organizata joqeveritare (OJQ)./UBTNews/