Humbjet totale ekonomike të shkaktuara nga fatkeqësitë natyrore arritën rreth 72 miliardë dollarë në gjysmën e parë të vitit 2022, të nxitura nga stuhitë dhe përmbytjet, vlerësoi gjigandi zviceran i sigurimeve Swiss Re.
“Efektet e ndryshimit të klimës janë të dukshme në ngjarjet gjithnjë e më ekstreme të motit, të tilla si përmbytjet e paprecedenta në Australi dhe Afrikën e Jugut”, tha Martin Bertogg, kreu i Swiss Re për rreziqet e katastrofave.
Grupi me bazë në Cyrih, tha se humbjet u shkaktuan gjithashtu nga stuhitë e dimrit në Evropë, si dhe stuhitë e forta në kontinent dhe në Shtetet e Bashkuara.
Të ashtuquajturat fatkeqësi natyrore dytësore si përmbytjet dhe stuhitë po ndodhin më shpesh, tha Swiss Re.
“Ndryshe nga uraganet apo tërmetet, këto rreziqe janë gjithkund dhe përkeqësohen nga urbanizimi i shpejtë në zonat veçanërisht të cenueshme”, tha ai.
“Duke pasur parasysh shkallën e shkatërrimit në të gjithë globin, rreziqet dytësore kërkojnë të njëjtin vlerësim të disiplinuar të rrezikut si rreziqet kryesore si uraganet”.
Swiss Re tha se përmbytjet në Indi, Kinë dhe Bangladesh konfirmojnë potencialin në rritje të humbjeve nga përmbytjet në zonat urbane.
Katastrofat e shkaktuara nga njeriu, si aksidentet industriale, shtuan 3 miliardë dollarë të tjera humbje ekonomike në 72 miliardë dollarët nga fatkeqësitë natyrore, duke e çuar totalin në 75 miliardë dollarë./UBTNews/