Tri raketa ruse kanë goditur ndërtesat në Vinnytsia, në Ukrainën qendrore, sipas zyrtarëve ukrainas. Së paku 17 persona, përfshirë edhe dy fëmijë kanë vdekur si pasojë e sulmeve, konfirmoi Zyra e Prokurorit të Përgjithshëm të Ukrainës.
Edhe dhjetëra të tjerë janë lënduar dhe operacionet e kërkimit po vazhdojnë, thuhet në njoftimin e Zyrës së Prokurorit.
Në një postim në Facebook, Shërbimi Shtetëror i Emergjencave të Ukrainës tha se “90 shpëtimtarë, si dhe trajnerë qensh dhe psikologë, po punojnë në skenën e tragjedisë së tmerrshme”.
Kyrylo Tymoshenko, nënkryetari i Presidencës së Ukrainës, përmes një postimi në Telegram e quajti sulmin “një krim tjetër të pushtuesve në qytetin tonë paqësor”.
Vinnytsia nuk ka qenë target i ndonjë sulmi të mëparshëm rus qëkur nisi pushtimi.
Ministri i Punëve të Jashtme i Ukrainës, Dmytro Kuleba dënoi sulmet ajrore përmes një postimi në Twitter./UBTNews/