Më 13 dhjetor 2024, studentët e UBT-së, nga departamenti i Shkencave Politike dhe Juridike, realizuan një vizitë studimore në Ministrinë e Drejtësisë së Republikës së Kosovës. Aktiviteti u organizua nga profesorët Avni H. Alidemaj, Alban Maliqi dhe Artan Tahiri, në kuadër të lëndëve E Drejta Administrative, Institucionet dhe Politikat e BE-së, dhe Politikat e Mirëqenies Sociale.
Vizita u pasurua nga prezantimet e zyrtarëve të lartë të Ministrisë, Valdon Bytyqi dhe Adea Geci. Ata ndanë njohuri të rëndësishme mbi proceset e hartimit dhe harmonizimit të kuadrit ligjor me standardet ndërkombëtare, duke theksuar rolin e Ministrisë në adresimin e sfidave ligjore dhe në përmbushjen e interesave të qytetarëve të Kosovës.
Përveç kësaj, prezantimet përfshinë një pasqyrë të detajuar mbi politikat e Ministrisë, duke u fokusuar në mënyrën se si funksionojnë proceset administrative dhe si mund të ndikojnë ato në mirëqenien e qytetarëve.
Kjo vizitë u ofroi studentëve mundësinë për të lidhur njohuritë teorike me përvojat praktike, duke nxitur një kuptim më të thellë të funksionimit të institucioneve qeveritare dhe proceseve ligjore në Kosovë. Iniciativa të tilla edukative janë pjesë e qasjes praktike që UBT promovon për përgatitjen e studentëve të saj për sfidat profesionale në të ardhmen./UBTNews/
