Në atë që dikur ishte oborri i spitalit Kamal Adwan në qytetin verior të Gazës, Beit Lahiya, palestinezët kalojnë nëpër rrënoja, duke kërkuar për kufoma.
Zëri i njërit prej tyre duke qarë dëgjohet ndërsa ai mbështjell trupin për t’u përgatitur për një varrim.
Mahmud Assaf, 50 vjeç, erdhi në spital nga Jabalia me një karrocë për të rikuperuar dy nga fëmijët e të afërmve të tij, të cilët kishin qenë pacientë në objekt për 10 ditë.
“Hadiun e gjeta të paralizuar… të shtrirë në shpinë nën karrige. Gjithçka ishte sipër tij”, tha ai, duke folur për njërin nga fëmijët që dukej pak i vetëdijshëm dhe i djegur rëndë.
Ministria e shëndetësisë e drejtuar nga Hamasi raportoi më 12 dhjetor se ushtria izraelite sulmoi spitalin Kamal Adwan në qytetin e Gazës gjatë një “rrethimi” që zgjati disa ditë.
Të shtunën, ushtria izraelite tha se “përfundoi aktivitetin e saj në zonën e spitalit Kamal Adwan”, për të cilin akuzoi se “ishte përdorur nga Hamasi si një qendër komandimi dhe kontrolli”.
Ushtria tha se kishte gjetur armë dhe kishte arrestuar rreth 80 anëtarë të Hamasit në objekt — spitali i fundit qeveritar funksional në Gazën veriore.
Assaf tha se donte t’i merrte fëmijët shpejt tani që ushtria ishte tërhequr, por ishte i tronditur nga “shkatërrimi masiv dhe i papërshkrueshëm” që gjeti në spital.
“Pacientët janë kudo. Nuk ka mbetur asgjë e përshtatshme për jetën”, tha ai.
“(Fëmijët kanë) raste të djegieve të rënda pa marrë asgjë për të ngrënë, pirë apo trajtim”, shtoi ai.
Hamasi akuzoi Izraelin për kryerjen e një “masakre të tmerrshme” në spital, duke pretenduar se forcat izraelite “qëlluan në dhomat e pacientëve”, arrestuan stafin dhe shkatërruan tendat e njerëzve të zhvendosur me buldozerë./UBTNews/