Kursimi është një element kyç për një mirëqenie të qëndrueshme, dhe është e rëndësishme që ky zakon të formohet në moshë të hershme. Ai ndihmon individët, burra e gra, të parandalojnë vështirësitë ekonomike dhe të ndërtojnë një të ardhme më të ndritshme për veten dhe familjet e tyre.
Dita Botërore e Kursimeve, e cila shënohet më 31 tetor, ka origjinën e saj që nga viti 1924, gjatë Kongresit të parë Ndërkombëtar të Bankës së Kursimeve në Milano të Italisë. Profesori italian Filippo Ravizza e shpalli këtë ditë si “Ditën Ndërkombëtare të Kursimeve” në përfundim të kongresit.
Kjo ditë ka për qëllim të nxjerrë në pah rëndësinë e kursimit për të ardhmen, duke theksuar nevojën për të kursyer për pensionin, arsimin, blerjen e pronës, martesën, dhe shumë qëllime të tjera. Po ashtu, është thelbësore të jemi të përgatitur për rrethana të paparashikuara, duke kursyer edhe nëse aktualisht nuk kemi plane të caktuara.
Në situata të caktuara, kursimi ka dëshmuar se është shpëtimtar, duke ndihmuar individët të përballen me situata të papritura dhe fatkeqe. Çdo vit, Dita Botërore e Kursimeve ka një temë të ndryshme që përmbledh frymën e kursimit dhe inkurajon më shumë njerëz të angazhohen në këtë zakon.
Në këtë ditë, qeveritë, institucionet si shkollat, dhe mediat organizojnë aktivitete për të rritur ndërgjegjësimin dhe për të inkurajuar më shumë njerëz të adoptojnë zakone të shëndetshme kursimi.
