Qindra të burgosur në Skoci do të lirohen në javët e ardhshme, si pjesë e një ligji të ri që synon të trajtojë mbipopullimin në burgje. Rreth 400 të dënuar, që po vuajnë dënime më të shkurtra se katër vjet, do të përfitojnë nga lirimi i parakohshëm, me kushtin që të kenë shlyer të paktën 40% të dënimit të tyre. Ky ligj përjashton ata që janë dënuar për abuzim në familje dhe krime seksuale.
Parlamenti skocez miratoi këtë reformë vitin e kaluar për të lehtësuar krizën e mbipopullimit, pasi burgjet e Skocisë aktualisht mbajnë më shumë se kapacitetin e tyre prej rreth 8,000 të burgosurish. Sistemi penal skocez po përballet me sfida të mëdha, përfshirë rritjen e dhunës, aktivitetet e bandave dhe kontrabandën, veçanërisht të drogës.
Sekretarja e Drejtësisë, Angela Constance, theksoi se masa ka për qëllim të lirojë hapësirë për të dënuarit më të rrezikshëm dhe se mbipopullimi është një çështje emergjente që kërkon vëmendje të menjëhershme./UBTNews/
