Parlamenti gjerman filloi të mërkurën “debatin e përgjithshëm” mbi buxhetin për vitin 2023, dhe kriza aktuale e energjisë në Evropë mund të jetë tema kryesore e diskutimeve.
Debati katërorësh në Bundestag, dhoma e ulët e parlamentit, shihet si kulmi i diskutimeve mbi buxhetin dhe tradicionalisht një forum për mosmarrëveshjet e nxehta rreth politikës së qeverisë midis kancelarit dhe liderëve të opozitës.
Debati u hap me një sulm të ashpër ndaj politikës së qeverisë nga lideri i opozitës Kristian Demokrate, Friedrich Merz, i cili akuzoi koalicionin se e ka neglizhuar mundësinë për të reformuar Gjermaninë në një situatë krize të shkaktuar kryesisht nga pushtimi rus i Ukrainës.
Scholz: Gjermania të dalë më e fuqishme nga kriza energjetike
Kancelari gjerman, Olaf Scholz iu kundërpërgjigj kritikave të Merz në lidhje me trajtimin e luftës nga qeveria në Ukrainë, ndër të tjera duke theksuar vendimin për të thyer politikën e mëparshme për të mos dorëzuar armë në zonat e konfliktit.
Scholz gjithashtu tha se qeveria e tij po përmbush premtimet për të ndihmuar familjet, ndër të tjera duke rritur pagesat e ndihmës së fëmijëve deri në 31 euro në muaj, rritja më e madhe në historinë e Gjermanisë moderne.
Duke folur për krizën aktuale energjetike të shkaktuar pjesërisht nga ulja e dërgesave të gazit nga Rusia mes pushtimit të saj në Ukrainë, Scholz tha se Gjermania e ka krizën “nën kontroll” dhe se ndërsa subvencionet nuk do të ndalnin plotësisht rritjen e çmimit të energjisë, ato do të ndihmonin në uljen e tyre në një “nivel të durueshëm”.
Gjermania ka fuqinë për të zotëruar krizën dhe për të dalë më e fortë prej saj./UBTNews/