Autoritetet shëndetësore në Gjermani regjistruan të mërkurën shifrën më të lartë të të infektuarve me koronavirus: 39,676. Shifra thyen rekordin e së premtes së kaluar prej 37,120 rastesh.
Instituti për kontrollin dhe parandalimin e sëmundjeve “Robert Koch” tha se incidenca shtatëditore – që tregon numrin e infeksioneve të reja për 100,000 banorë – është rritur në 232.1, krahasuar me 146.6 një javë më parë dhe 66.1 një muaj më parë.
Sipas të dhënave të reja, në 24 orët e fundit në Gjermani u regjistruan edhe 236 viktima nga koronavirusi.
Shifra rekorde të të infektuarve u raportuan të mërkurën edhe në Republikën Çeke.
Autoritetet shëndetësore në këtë vend konfirmuan 14,539 raste të reja pozitive – shifra më e lartë ditore qysh në muajin mars – dhe 56 viktima.
Shkalla e lartë e infeksionit vjen përkundër normave relativisht të larta të vaksinimit: në Gjermani mbi 67 për qind, në Çeki mbi 57 për qind.
Megjithatë, profesionistët shëndetësorë bëjnë thirrje për vaksinimin e mbi 80-85 për qind të qytetarëve të një vendi.
Me shifra të larta të të infektuarve po përballen edhe vende të tjera në Evropë, përfshirë Bullgarinë, Rumaninë, Ukrainën e të tjera.
Javën e kaluar, Organizata Botërore e Shëndetësisë ka thënë se Evropa është bërë “epiqendër e pandemisë”./REL