Kreu i një OJQ-je ka udhëtuar drejt Afganistanit për t’u kërkuar talibanëve që të anulojnë vendimin për ndalimin e punës së grave në OJQ, duke paralajmëruar se “do të humbasin jetë” nëse nuk e bëjnë këtë.
Afganistani po përballet me një nga krizat më të rënda humanitare në botë, thonë agjencitë ndërkombëtare të ndihmës, me 38 milionë të popullsisë së tij të uritur dhe tre milionë fëmijë në rrezik nga kequshqyerja.
Disa OJQ kanë pezulluar operacionet e tyre në shenjë proteste ndaj urdhrit që u shpall në fund të dhjetorit, duke prekur mijëra gra në stafin e OJQ-ve.
Talibanët përmes përfaqësuesve të tyre “kanë premtuar se nuk do të ketë ndalesa për arsimimin e femrave apo për punonjëset femra”, tha Jan Egeland, sekretari i përgjithshëm i Këshillit të pavarur Norvegjez të Refugjatëve (NRC).
“Është e qartë se ne jemi mashtruar nga qeveria talibane. Është e qartë se ata po na e bëjnë të pamundur punën tani”, i tha ai AFP-së të hënën.
Pas takimeve në Kabul, Egeland planifikon të udhëtojë në Kandahar, qendra de facto e pushtetit të talibanëve nga ku lideri suprem i lëvizjes Hibatullah Akhundzada nxjerr dekretet e tij./UBTNews/