Shtetet e Bashkuara thanë të hënën se një marrëveshje ishte e mundur me Iranin për programin e tij bërthamor, por se një pajtim duhej të arrihej urgjentisht ndërsa Teherani po avancon aftësitë e tij.
Negociatat, ku marrin pjesë Kina, Franca, Gjermania, Rusia, Mbretëria e Bashkuar, Irani dhe Shtetet e Bashkuara, do të rifillojnë në Vjenë pasi u ndërprenë në fund të muajit të kaluar.
Ato vijnë pasi palët cituan përparim në kërkimin për të ringjallur marrëveshjen e vitit 2015 që supozohej të parandalonte Iranin nga marrja e një bombe atomike, qëllim ky që vendi gjithmonë e ka mohuar se ndjekë.
“Një marrëveshje që adreson shqetësimet thelbësore të të gjitha palëve është në horizont, por nëse nuk arrihet në javët e ardhshme, përparimet e vazhdueshme bërthamore të Iranit do ta bëjnë të pamundur për ne kthimin në JCPOA”, tha një zëdhënës i Departamentit të Shtetit të SHBA-së, duke iu referuar marrëveshjes në kuadër të vitit 2015.
Palët kanë negociuar në Vjenë që nga viti i kaluar me pjesëmarrje indirekte të SHBA-së. Ndonëse Uashingtoni ka kërkuar negociata të drejtpërdrejta, ato mbeten indirekte me kërkesën e Iranit.
Kancelari gjerman Olaf Scholz e quajti atë “momenti vendimtar” në një intervistë me Washington Post të publikuar të hënën. “Ne u dhamë atyre një mesazh të qartë se tani është koha për vendime dhe për përparim, dhe jo për zvarritje të procesit”, tha ai. “Shpresojmë se do ta shfrytëzojnë rastin”./UBTNews/