Pretendohet se Shërbimi i të Ardhurave të Brendshme në SHBA (IRS) do të pushojë nga puna rreth 7.000 punëtorë si pjesë e përpjekjeve për tkurrjen e fuqisë punëtore federale.
Sipas lajmeve në mediat kombëtare bazuar në burime që nuk janë bërë të ditur, IRS po përgatitet të pushojë nga puna rreth 7.000 punonjës në total, veçanërisht ata të punësuar në fund të mandatit të ish-presidentit Joe Biden.
“New York Times” raportoi se IRS u dërgoi email punonjësve në lidhje me këtë çështje dhe i njoftoi ata se pushimet nga puna do të kryhen brenda IRS në përputhje me një urdhër ekzekutiv.
“Nuk kemi shumë detaje që lejohemi t’i ndajmë, por gjithçka është e lidhur me urdhrin ekzekutiv“, thuhet në email.
Vlerësohet se pushimet nga puna në fjalë janë pjesë e përpjekjeve të administratës së presidentit amerikan Donald Trump për tkurrjen e fuqisë punëtore federale.
Media kombëtare raportoi se IRS punëson rreth 100 mijë personel në mbarë vendin. Në IRS, mbledhësi i të ardhurave të vendit, është e paqartë se si do të ndikojnë pushimet nga puna në shërbimet e mbledhjes së tatimeve këtë vit.
Presidenti Trump pati njoftuar se do të miratojë politika për të “reduktuar burokracinë federale dhe humbjet” në mandatin e tij të dytë, ndërsa kishte emëruar biznesmenin miliarder Elon Musk në krye të Departamentit të Efiçencës së Qeverisë (DOGE), që u themelua në këtë drejtim.