Amerika nuk ka parë asnjë indikacion për përgatitjen e trupave bjelloruse për t’u vendosur në Ukrainë, ka thënë një zyrtar i lartë ushtarak amerikan.
Burimi i tha Zërit të Amerikës se kjo qëndron, pavarësisht se trupat ruse dhe bjelloruse vazhdojnë të stërviten së bashku.
Ekspertët perëndimorë besojnë se Rusia po shtyn që Bjellorusia të hyjë drejtpërdrejt në luftë – por deri më tani asnjë ushtar bjellorus nuk është dërguar në Ukrainë.
Moska e ka përdorur Bjellorusinë si një pikënisje për disa nga ofensivat e saj, veçanërisht ato që synojnë qytetin verior të Ukrainës – dhe kryeqytetin – Kievin.
Zyrtari tha gjithashtu se luftimet e ashpra po vazhdojnë rreth qytetit lindor të Bakhmut dhe zonave përreth, por fusha e betejës “nuk ka ndryshuar ndjeshëm”./UBTNews/