Shtetet e Bashkuara kanë kryer një raund të katërt sulmesh ndaj Huthive të mbështetur nga Irani në Jemen, konfirmuan zyrtarët e Pentagonit të mërkurën mbrëma.
Rreth 14 raketa Huthi, për të cilat SHBA thotë se mund të kenë qenë të destinuara për sulme ndaj anijeve në Detin e Kuq, u vunë në shënjestër të forcave amerikane. Sulmet vijnë pasi SHBA i cilësoi Huthi-t si “terroristë globalë”.
Këshilltari i Sigurisë Kombëtare i SHBA-së, Jake Sullivan tha se masa, e cila anuloi një vendim për të hequr përcaktimin në ditët e para të administratës së Biden, ishte në përgjigje të sulmeve të vazhdueshme të militantëve ndaj anijeve tregtare në rajon.
Huthit filluan të sulmojnë anijet tregtare në muajin nëntor, duke thënë se po i përgjigjeshin operacionit ushtarak të Izraelit në Gaza. Që atëherë, grupi ka nisur dhjetëra sulme ndaj cisternave komerciale që kalojnë nëpër Detin e Kuq, një nga korsitë më të ngarkuara të anijeve në botë.
Si përgjigje, SHBA dhe Britania e Madhe nisën një valë sulmesh ajrore kundër dhjetëra objektivave Huthi më 11 janar. Sulmet – të mbështetura nga Australia, Bahreini, Holanda dhe Kanadaja – filluan pasi forcat Huthi injoruan një ultimatum për të ndërprerë sulmet e tyre në rajon, shkruan BBC.
Jemeni është shkatërruar nga një luftë civile që u përshkallëzua në vitin 2015, kur Huthit morën kontrollin e pjesëve të mëdha të perëndimit të vendit nga qeveria e njohur ndërkombëtarisht dhe një koalicion i udhëhequr nga Arabia Saudite ndërhyri në një përpjekje për të rivendosur sundimin e tij.
Luftimet thuhet se kanë lënë më shumë se 160 mijë njerëz të vdekur dhe kanë shkaktuar një nga krizat më të këqija humanitare në botë, me dy të tretat e popullsisë – 21 milionë njerëz – në nevojë për një formë ndihme.