Administrata Biden ka punuar me ekonomistë zviceran dhe afganë për të krijuar një fond të ri që mund të shërbejë si një mekanizëm për të vënë në përdorim miliarda dollarë para të ngrira afgane në mënyrë që të promovohet stabiliteti ekonomik në vend, sipas dy zyrtarëve të lartë amerikanë.
SHBA po transferon 3.5 miliardë dollarë në “fondin e ri afgan”, por zyrtarët thanë se nuk do t’i lëshojnë paratë menjëherë sepse nuk ka asnjë institucion të besuar në Afganistan për të garantuar se nga fondi do të përfitojë populli afgan, thanë zyrtarët.
Transferimi i këtyre fondeve në bankën qendrore afgane do të varet nga dy faktorë kyç: menaxhimi i përgjegjshëm i bankës dhe garancitë se fondet nuk do të devijohen te terroristët apo kriminelët, shtuan zyrtarët.
“Ne nuk e kemi atë besim sot”, tha një zyrtar i lartë amerikan. Së paku, banka qendrore afgane do të duhet “të demonstrojë pavarësinë e saj nga ndikimi dhe ndërhyrja politike”.
Shtetet e Bashkuara kanë qenë të qarta duke i thënë bankës qendrore – e njohur si Da Afganistan Bank (DAB) – se çfarë hapash do të duhej të ndërmerrte dhe i përsëriti ato hapa në një letër dërguar këtë javë nga zëvendëssekretari i Thesarit i Shteteve të Bashkuara.
Në fillim të këtij viti, presidenti Joe Biden nënshkroi një urdhër ekzekutiv që lejon që 7 miliardë dollarë në asete të ngrira nga banka qendrore e Afganistanit të shpërndahen përfundimisht brenda vendit dhe që potencialisht të financohen proceset gjyqësore të ngritura nga familjet e viktimave të sulmeve terroriste të 11 shtatorit 2001.
Fondet u ngrinë nga qeveria amerikane pasi qeveria afgane u rrëzua vitin e kaluar dhe talibanët morën kontrollin e vendit./UBTNews/