Qeveria e Kosovës e udhëhequr nga kryeministri i Kosovës, Albin Kurti, sipas deputetit të Lidhjes Demokratike të Kosovës, Driton Selmanaj, po promovon si një vendim të ri themelimin e Zyrës për Preshevë, Medvegjë dhe Bujanoc, ani pse e njëjta ishte themeluar para dy vitesh, kur në krye të ekzekutivit ishte Avdullah Hoti.
“Me 28 shtator 2020 Qeveria e Kosovës më qëllim të institucionalizimit të mbështetjes shtetërore për shqiptarët që jetojnë në Preshevë, Medvegjë e Bujanoc ka votuar në mbledhjen e saj për themelimin e kësaj Zyre”, ka shkruar Selmanaj në rrjetin e tij social në Facebook.
Qeveria e udhëhequr asokohe nga Hoti, sipas Selmanajt, përveç se ka votuar për themelimin e kësaj zyreje, ka miratuar edhe planin e punës me qëllim të zbatimit të këtij vendimi.
“Me qëllim të zbatimit të këtij vendimi me 13 janar 2021 qeveria Hoti ka miratuar edhe planin e punës për këtë Zyre, ku janë përcaktuar dhe detyrat konkrete për ministritë e caktuara”, ka shtuar ai.
Ndryshe një ditë më parë, Albin Kurti kumtoi lajmin se Ardita Sinani tani e tutje është këshilltarja e tij për Preshevë, Medvegjë dhe Bujanoc.
Përpos kësaj, Sinani ishte emëruar edhe koordinatore e Zyrës për Preshevë, Medvegjë dhe Bujanoc në kuadër të Zyrës së Kryeministrit, të cilën Kurti e kishte prezantuar si një zyrë e cila është në themelim e sipër.