Kancelari i Gjermanisë tha sot se ishte “i neveritur nga komentet e egra” të bëra nga presidenti palestinez Mahmoud Abbas në Berlin, duke akuzuar Izraelin për kryerjen e “50 holokausteve” kundër palestinezëve gjatë viteve.
Deklarata e kancelarit gjerman Olaf Scholz në Twitter erdhi një ditë pasi Abbas refuzoi të dënojë një sulm vdekjeprurës nga militantët palestinezë ndaj atletëve izraelitë në Lojërat Olimpike të Mynihut të vitit 1972. Në vend të kësaj, Abbas u kundërpërgjigj duke thënë se ai mund të tregonte “50 holokaustet” nga Izraeli.
“Jam i neveritur nga komentet e egra të bëra nga presidenti palestinez Mahmoud Abbas”, tha Scholz. “Unë dënoj çdo përpjekje për të mohuar krimet e Holokaustit”.
Scholz u kritikua si në Gjermani ashtu edhe në Izrael për mos refuzimin e komenteve të Abbasit menjëherë në konferencën për shtyp që ai mbajti me të.
Abbas, duke qëndruar pranë Scholz të martën, u pyet nëse do të kërkonte falje në emër të militantëve palestinezë që kryen pengmarrjen në Lojërat Olimpike të Mynihut të vitit 1972, në të cilën u vranë 11 izraelitë.
Udhëheqësi palestinez nuk dha një përgjigje të drejtpërdrejtë, por foli për situatën me të cilën përballen palestinezët, duke akuzuar Izraelin se ka kryer “50 masakra, 50 holokauste” kundër palestinezëve që nga viti 1947./UBTNews/