Një ruse që jeton në Mbretërinë e Bashkuar është e shqetësuar se komuniteti i saj do të përballet me diskriminim në rritje si rezultat i pushtimit rus të Ukrainës.
Kate Severdova nga Wolverhampton, u trondit nga pushtimi i Ukrainës dhe tha se nuk e mbështet presidentin Vladimir Putin.
“Nuk më vjen turp të them se jam ruse, por kam pak frikë, jam e shqetësuar se shoqëria do të ketë këtë perceptim se të gjithë rusët janë të këqij”, tha ajo.
Severdova ka lindur në Krime dhe u transferua në Mbretërinë e Bashkuar në vitin 2008 me djalin e saj të vogël, në kërkim të një jete më të mirë. Sipas saj, kjo nuk ishte për faj të rusëve.
“Në të kaluarën kam ndjerë një lloj respekti për presidentin Putin, sepse ai e solli Rusinë në një vend të begatë, për mendimin tim. Por në 10 vitet e fundit do të thosha, nuk e di nëse ai po plaket, por ai thjesht po bëhet më i ligë”, tha Severdova.
Rusia nisi ofensivën e saj ushtarake në Ukrainën fqinje javën e kaluar. Kur Rusia pushtoi Ukrainën nga toka, deti dhe ajri të enjten, Severdova tha se ishte në shok, sepse nuk e kishte menduar kurrë se do të ndodhte.
Të dielën, rusët në Mbretërinë e Bashkuar iu bashkuan protestuesve ukrainas në demonstrata në të gjithë vendin kundër pushtimit rus në Ukrainë.
Severdova tha se ka parë një sërë postimesh në rrjete sociale në lidhje me rusët, të cilët u shënjestruan dhe abuzuan, dhe ajo është veçanërisht e shqetësuar për ekspozimin e djalit të saj ndaj diskriminimit në shkollë.
“Jam e shqetësuar, ne nuk duam që kjo të ndodhë sepse nuk kemi të bëjmë asgjë me të”, tha ajo./UBTNews/