Mbrojtja e Ukrainës nuk është “jetike” për Shtetet e Bashkuara, tha kandidati i mundshëm për president Ron DeSantis, duke nënvizuar se dy pretendentët kryesorë republikanë nuk e shohin pushtimin rus të Kievit si një prioritet të politikës së jashtme.
DeSantis, guvernatori 44-vjeçar i Floridës, tha se Shtetet e Bashkuara “kanë shumë interesa jetike kombëtare” por se “përfshirja e mëtejshme në një mosmarrëveshje territoriale midis Ukrainës dhe Rusisë nuk është një prej tyre”.
Vërejtja e lidh DeSantis, i cili konsiderohet se do t’i bashkohet garës së vitit 2024, me ish-presidentin Donald Trump në kundërshtimin e politikës republikane për mbështetjen e Kievit.
DeSantis u pyet nëse kundërshtimi i Rusisë në Ukrainë ishte një interes jetik strategjik kombëtar amerikan. Përgjigja e tij demonstron çarjen e mprehtë brenda një partie që tradicionalisht ka lobuar për angazhim të fuqishëm të SHBA-së në skenën globale, përcjell UBT News.
“Financimi virtual i “çekut bosh” të administratës Biden të këtij konflikti “për aq kohë sa duhet”, pa ndonjë objektiv apo llogaridhënie të përcaktuar, largon vëmendjen nga sfidat më të ngutshme të vendit tonë”, u shpreh DeSantis.
Trump, duke iu përgjigjur të njëjtës pyetje tha“Jo, por është për Evropën. Por jo për Shtetet e Bashkuara”.
Republikanët kanë argumentuar prej kohësh se mbrojtja e Ukrainës dhe ndalimi i mëtejshëm i ekspansionizmit rus është thelbësor për interesat e SHBA-së dhe jo vetëm për sigurinë evropiane.
Pozicioni që DeSantis ka shprehur është në kontrast me atë që kishte ndërsa ishte në Kongres, kur ai mbështeti ndihmën ushtarake për Ukrainën pas aneksimit të Gadishullit të Krimesë nga Moska në 2014.
Ai gjithashtu mbështeti një rezolutë që i bënte presion presidentit të atëhershëm Barack Obama për të siguruar armë për të ndihmuar Kievin “të mbrojë territorin e tyre sovran nga agresioni i paprovokuar dhe i vazhdueshëm i Federatës Ruse”./UBTNews/