Reklamat e makinave në Francë së shpejti duhet t’i drejtojnë njerëzit drejt opsioneve më të gjelbra të transportit.
Ligji i ri do të fillojë për prodhuesit e makinave nga marsi, pasi presidenti Macron kërkon të frenojë ndotjen e ajrit në vend.
Franca po përpiqet të ulë emetimet e gazeve serë me 40 për qind deri në vitin 2030 krahasuar me nivelet e vitit 1990 dhe mbështetësit besojnë se kjo rregullore është një hap në drejtimin e duhur.
Si përshtaten reklamat në planet e Francës për përmirësimin e klimës?
Ligji i ri është një nga një sërë masash që Franca po zbaton për të ndihmuar në përmbushjen e objektivave të saj klimatike. Macron ka rritur gjithashtu ekotaksën maksimale për blerjen e makinave që lëshojnë nivele të larta të gazeve serë nga 30 mijë euro në 40 mijë euro.
Strasburgu ishte qyteti i parë evropian që përdori një “sistem inteligjent të menaxhimit të trafikut”. Kjo zvogëloi emetimet e oksideve të dëmshme të azotit dhe grimcave nga automjetet me 8 – 9 për qind.
Ndërsa në Paris, kryebashkiakja Anne Marie Hidalgo ka eksperimentuar me një sërë rregullash për trajtimin e trafikut, duke përfshirë ndalimin e automjeteve me naftë të prodhuara para vitit 2006 gjatë ditëve të javës.