Rreth një miliard fëmijë janë në “rrezik jashtëzakonisht të lartë” për shkak të dëmeve nga ndryshimet klimatike, paralajmëroi një grup i të drejtave të njeriut këtë fundjavë, duke shtuar se standardet e jetesës së të rinjve nuk u përmirësuan në dekadën e fundit.
Indeksi i KidsRights, bazuar në shifrat e ofruara nga agjencitë e OKB-së, tha gjithashtu se më shumë se një e treta e fëmijëve në botë, rreth 820 milionë, ishin aktualisht të ekspozuar ndaj valëve të të nxehtit.
Mungesa e ujit preku 920 milionë fëmijë në mbarë botën, ndërsa sëmundje të tilla si malaria dhe dengoja prekën rreth 600 milionë fëmijë, ose një në çdo katër, tha OJQ holandeze KidsRights.
Indeksi i të Drejtave të Fëmijëve është renditja e parë dhe e vetme që mat se si respektohen të drejtat e fëmijëve çdo vit, duke renditur Islandën, Suedinë dhe Finlandën si më të mirat për të drejtat e fëmijëve dhe Sierra Leone, Afganistan dhe Çad si më të këqijat, nga 185 vende.
Nga tre vendet e para, vetëm renditja e Suedisë ndryshoi nga viti i kaluar, duke kaluar në vendin e dytë nga vendi i katërt.
Marc Dullaert, themelues dhe kryetar i KidsRights, e përshkroi raportin e këtij viti si “alarmant për brezat tanë aktualë dhe të ardhshëm të fëmijëve”.
“Një klimë që ndryshon me shpejtësi po kërcënon tani të ardhmen e tyre dhe të drejtat e tyre themelore” tha ai.
“Nuk ka pasur asnjë përparim të rëndësishëm në standardet e jetës së fëmijëve gjatë dekadës së fundit dhe mbi të gjitha mjetet e jetesës së tyre janë ndikuar rëndë nga pandemia Covid-19”, shtoi Dullaert.
Pandemia e Covid-19 pati një ndikim të rëndë te fëmijët, të cilët nuk ishin në gjendje të merrnin ushqim ose ilaçe për shkak të bllokimeve dhe mbylljes së klinikave, duke çuar në vdekjen e rreth 286,000 nën moshën pesë vjeç si rezultat, tha KidsRights.
Për herë të parë në dy dekada, numri i fëmijëve që punojnë është rritur në 160 milionë, që përfaqëson një rritje prej 8.4 milionë gjatë katër viteve të fundit, tha Indeksi i të Drejtave të Fëmijëve, i cili është përpiluar së bashku me Universitetin Erasmus të Roterdamit.
KidsRights theksoi Angolën dhe Bangladeshin, duke thënë se të dy vendet kanë përmirësuar ndjeshëm rezultatet e tyre në lidhje me të drejtat e fëmijëve.
Por raporti goditi gjithashtu Malin e Zi për numrin e ulët të vaksinimeve, i renditur i 49-ti në indeks./UBTNews/