Qeveria e koalicionit gjerman po punon për ta bërë më të lehtë për migrantët që të bëhen shtetas gjermanë, sipas raporteve lokale.
Gazeta gjermane Bild raportoi të premten se Ministria e Brendshme po punon për një projektligj që do t’i lejojë të huajt që banojnë në Gjermani të aplikojnë për natyralizim pas pesë vjetësh në vend të tetë viteve.
Nëse ata kanë përfunduar “masat e veçanta të integrimit”, mund të jetë e mundur edhe të aplikojnë për një pasaportë gjermane pas tri vjetësh.
Ministria i tha gazetës se ende po diskutojnë rreth propozimeve dhe se asgjë nuk është finalizuar ende.
Sipas raportit, fëmijëve të lindur në Gjermani nga prindër të huaj do t’u jepet automatikisht shtetësia nëse njëri prind ka pasur “qëndrim të rregullt ligjor” në Gjermani për pesë vjet.
Ministrat nga 16 shtetet e Gjermanisë edhe më parë i kanë bërë thirrje qeverisë federale të përshpejtojë procesin që fëmijët e lindur nga të huajt që jetojnë në Gjermani të bëhen shtetas gjermanë./UBTNews/