Sipas policisë së Kapitolit të SHBA-së, rreth 12 persona u arrestuan për “protesta të paligjshme” brenda ndërtesës së zyrës së Senatit.
Në një skenë kaotike, protestuesit me duar “të përgjakur”, duke kërkuar një armëpushim në Gaza, ndërprenë dëshminë e Sekretarit të Shtetit të SHBA-së, Antony Blinken, para Komitetit të Ndarjeve të Senatit në Kongres të martën.
Protestuesit me duar të lyera me ngjyrë të kuqe, e ndërprenë Blinken disa herë duke brohoritur slogane si “Armëpushim tani!” “Mbroni fëmijët e Gazës!” dhe “Ndaloni financimin e gjenocidit”. Madje, një protestues bërtiti: “Blinken, ke duart me gjak. Vrasës!”, sipas Reuters.
Protestuesit mbanin gjithashtu tabela që bënin thirrje për një armëpushim dhe mos financimin e Izraelit nga SHBA.
Dëshmia e Blinken ishte pjesë e një seance dëgjimore që shqyrtonte kërkesën e administratës së Presidentit Joe Biden për financimin shtesë të sigurisë kombëtare për Izraelin përpara Komitetit të Ndarjeve të Senatit. Administrata ka kërkuar 106 miliardë dollarë fonde shtesë, të cilat do të përdoren në Ukrainë, Izrael dhe vende të tjera që përballen me situata të ngjashme me luftën.
Gjatë gjithë ndërprerjeve, Blinken vazhdoi të përshkruante kërkesën për ndihmë duke thënë se 106 miliardë dollarë, 3.7 miliardë dollarë do t’i dedikoheshin “nevojave të sigurisë” të Izraelit, duke përfshirë forcimin e sistemeve të mbrojtjes ajrore dhe raketore. Një financim tjetër prej 50 miliardë dollarësh “do të plotësojë rezervat ushtarake të SHBA-së, do të forcojë bazën tonë industriale të mbrojtjes vendase dhe do të shpenzohet përmes bizneseve amerikane”, shtoi ai.
Sipas një raporti të CBS news, protestuesit i përkisnin një organizate të quajtur CODEPINK. Disa anëtarë, duke përfshirë një veteran të ushtrisë amerikane, ish-diplomat dhe aktivist paqeje u arrestuan për protestën. CODEPINK tha se duart e anëtarëve të lyer me të kuqe kishin për qëllim të simbolizonin gjakun./UBTNews/