Protestuesit i vunë zjarrin ambasadës së Suedisë në kryeqytetin irakian Bagdad herët sot, tha një gazetar i AFP-së, përpara djegies së planifikuar të një Kurani në Suedi.
Autoritetet suedeze miratuan një asamble që do të mbahet më vonë të enjten jashtë ambasadës irakiane në Stokholm, ku organizatorët planifikojnë të djegin një kopje të Kuranit si dhe një flamur irakian.
Irakianët janë zemëruar nga ngjarjet në Suedi dhe protesta e së enjtes në Bagdad u organizua nga mbështetësit e liderit fetar Moqtada Sadr.
Policia irakiane përdori topa uji për të shpërndarë demonstruesit larg ambasadës, ndërsa forcat e sigurisë të armatosura me shkopinj elektrike ndoqën protestuesit, tha një fotograf i AFP në vendngjarje.
“Ne jemi të mobilizuar sot për të denoncuar djegien e Kuranit, [libër ky] i cili ka të bëjë me dashurinë dhe besimin”, tha protestuesi Hassan Ahmed për AFP. Ne kërkojmë që qeveria suedeze dhe qeveria e Irakut të ndalojnë këtë lloj iniciative.
Disa protestues kishin ngritur kopje të Kuranit në ajër, ndërsa të tjerë mbanin portretet e Mohamed al-Sadr, një klerik i rëndësishëm fetar dhe babai i Moqtada Sadr.
Ministria e Jashtme e Suedisë i tha AFP-së stafi i ambasadës së saj në Bagdad ishte “i sigurt” pas incidentit./UBTNews/