Në të gjithë Greqinë veriore shpërthyen protesta të dhunshme të hënën pasi policia e plagosi me armë zjarri një adoleshent të komunitetit rom.
16-vjeçari, i cili po trajtohet në një spital në Selanik, u qëllua në kokë nga një zyrtar policor. Polici u arrestua dhe u suspendua nga puna.
Policia e ndoqi adoleshentin pasi ai dyshohet se mbushi automjetin e tij në një pikë karburanti dhe u largua pa paguar një faturë prej 20 €. Ngjarja ndodhi jashtë Selanikut në orët e hershme të së hënës.
Rreth 1 mijë e 500 persona morën pjesë në protestën e organizuar nga grupet e majta dhe anarkiste në qendër të Selanikut. Disa thyen dyqanet dhe hodhën kokteje molotov ndaj policisë, e cila u përgjigj me gaz lotsjellës./UBTNews/