Polakët që mbështesin anëtarësimin e vendit të tyre në Bashkim Evropian kanë protestuar të dielën në gjithë shtetin, pas shqetësimeve se mund të largohen nga blloku evropian.
Të enjten e javës së kaluar, Gjykata Kushtetuese e Polonisë ka marrë vendim që disa artikuj të ligjit të BE-së, nuk janë në përputhje me kushtetutën polake.
Organizatorët thanë se protestat u zhvilluan në 100 qytete e qyteza, dhe 100 mijë protestues u mblodhën vetëm në Varshavë, kryeqytetin e Polonisë.
Vendimi i gjykatës në fakt refuzoi parimin kryesor që ligji i BE-së ka përparësi mbi legjislacionin kombëtar.
Kryeministri i Polonisë, Mateusz Morawiecki e ka mbrojtur këtë vendim.
“Ne i kemi të drejtat e barabarta sikurse vendet tjera. Dëshirojmë që këto të drejta të na respektohen”, ka shkruar ai në Facebook pas vendimit.
Ai insistoi se pavarësisht protestave “Vendi i Polonisë është dhe do të jetë në familjen evropiane të kombeve” dhe se partia e tij nuk ka plane për dalje nga ky bllok, apo “Polexit”./UBTNews