Kryeministri i Kosovës, Albin Kurti, e ka përmendur si zgjidhje ndërtimin e strehimoreve për qentë endacakë në katër komuna të ndryshme.
Në lidhje me këtë problem, Kurti tha se qeveria ka formuar grupin koordinues të udhëhequr nga ministria e Administrimit të Pushtetit Lokal, ku sipas tij, strategjia e këtij grupi parasheh ndërtimin e katër strehimoreve për qen.
“Është çështja e qenve të braktisur dhe endacakë. Ky është një shqetësim që e ndan një komunë, për të cilin qeveria e ka krijuar grupin koordinues, të udhëhequr nga MAPL-ja. Strategjia e dalur nga ai grup parasheh disa hapa ndërinstitucionalë, ndër to ndërtimin e strehimoreve dhe zhvillimin e shërbimeve lokale të menaxhimit të qenve”, ka deklaruar shefi i Qeverisë në takim me kryetarët e komunave të Kosovës.
Ai tha se grupi punues për trajtimin e çështjes së qenve endacakë propozon ndërtimin e strehimoreve në komunën e Prishtinës, Prizrenit, Pejës dhe Gjilanit e Kamenicës.
“Për momentin, grupi punues propozon ndërtimin e katër strehimoreve në katër komuna. Në Prishtinë, Prizren, Pejë dhe Gjilan/Kamenicë, të ndërtuara këto bazuar në udhëzimin administrativ aktual. Me këtë rast, iu bëj thirrje që të bashkëpunoni sa më shumë me këtë grup punues në arritjen e objektivave”.