Krimea, gadishulli i Detit të Zi i aneksuar nga Rusia në vitin 2014, nuk do të jetë më kurrë pjesë e Ukrainës, tha të hënën presidenti kroat Zoran Milanoviç në një fjalim duke detajuar kundërshtimin e Zagrebit që t’i jepte ndihmë ushtarake Kievit.
Ajo që Perëndimi po bën për Ukrainën “është thellësisht imorale sepse nuk ka zgjidhje (për luftën)” u tha Milanoviç, duke iu referuar mbështetjes ushtarake perëndimore për Kievin, raporton UBT News.
Ai shtoi se ardhja e tankeve gjermane në Ukrainë do të shërbente vetëm për ta afruar Rusinë me Kinën, duke shtuar se“është e qartë që Krimea nuk do të jetë më kurrë pjesë e Ukrainës”.
Kujtojmë se presidenti ukrainas, Volodymyr Zelenskyy është zotuar ta rikthejë edhe Krimenë, gadishull ky i aneksuar nga Rusia në 2014.
Milanoviç kritikoi vendet perëndimore për përdorimin e standardeve të dyfishta në politikën ndërkombëtare, duke thënë se Rusia do të përdorte atë që ai e quajti “aneksimin e Kosovës” nga komuniteti ndërkombëtar si një justifikim për marrjen e pjesëve të Ukrainës.
Ai i referohej shpalljes së pavarësisë së Kosovës në vitin 2008 pas një lufte të viteve 1998-1999, ku NATO bombardoi Jugosllavinë, e përbërë nga Serbia dhe Mali i Zi, për të mbrojtur Kosovën me shumicë shqiptare.
“Ne e njohëm Kosovën kundër vullnetit të një shteti (Serbisë) të cilit i përkiste Kosova”, tha ai, duke paralajmëruar se nuk po vinte në dyshim pavarësinë e Kosovës por konceptin e standardeve të dyfishta perëndimore./UBTNews/