Polonia ka pezulluar përkohësisht të drejtën e migrantëve që arrijnë në Poloni përmes kufirit me Bjellorusinë për të kërkuar azil.
Kryeministri Donald Tusk e shpalli këtë pas miratimit të një ligji të ri që lejon autoritetet polake të pezullojnë këtë të drejtë deri në 60 ditë. Tusk tha se ky ligj do të zbatohej “pa vonesë”, ndërsa Presidenti Andrzej Duda e vlerësoi si të nevojshëm për të forcuar sigurinë kufitare të vendit.
Ky ligj ka ngjallur kritika nga grupet e të drejtave të njeriut, si Human Rights Watch, që e konsideruan si një shkelje të obligimeve ndërkombëtare dhe të atyre të BE-së. Grupi kërkoi që Komisioni Evropian të ndërmarrë veprime ligjore kundër Polonisë nëse ligji zbatohet, duke e quajtur këtë akt si një mënyrë për të mbyllur përfundimisht kufirin Poloni-Bjellorusi.
Pavarësisht kritikave, qeveria ka theksuar se pezullimi i të drejtës për azil do të aplikohet vetëm për ata që paraqesin rrezik për sigurinë e shtetit, siç janë grupet e organizuara të migrantëve që tentojnë të kalojnë kufirin. Pjesë të ligjit parashikojnë përjashtime për të miturit, gratë shtatzëna, të moshuarit dhe ata që janë të sëmurë, si dhe për ata që janë në rrezik serioz dëmtimi nëse kthehen. Pas vitit 2021, Polonia dhe shtetet e tjera të Evropës Lindore kanë përjetuar një rritje të madhe të kalimeve të paligjshme nga Bjellorusia dhe Rusia, dhe autoritetet polake kanë vendosur mijëra trupa dhe roje kufitare për të mbikëqyrur kufirin.