Kryeministri polak, Mateusz Morawiecki paralajmëroi të enjten për “provokime dhe intriga të mëtejshme” që mund të lindin nga ana tjetër e kufirit lindor të vendit të tij me Bjellorusinë dhe Rusinë, mes tensioneve në rritje midis Varshavës dhe Minskut.
“Ne paralajmërojmë kundër provokimeve nga Rusia dhe Bjellorusia. Grupi Wagner mund të kryejë veprime sabotuese dhe të gjithë ata që e nënvlerësojnë këtë kërcënim mund të jenë përgjegjës për provokime dhe intriga të mëtejshme nga ajo anë”, tha Morawiecki në një postim në Twitter.
Më 29 korrik, Morawiecki tha se më shumë se 100 mercenarë të Wagner kanë lëvizur drejt një rripi të hollë toke midis Polonisë dhe Lituanisë, i njohur si hendeku ose korridori Suwalki, dhe se ky ishte “një hap drejt një sulmi të mëtejshëm hibrid në territorin polak”. Morawiecki tha gjithashtu se mercenarët e Wagner mund të përpiqen të paraqiten si emigrantë në mënyrë që të kalojnë nga Bjellorusia në Poloni.
Të enjten, presidenti bjellorus, Alexander Lukashenko mohoi pretendimet e Polonisë se rreth 100 luftëtarë janë afruar më pranë kufirit polak dhe tha se Varshava duhet ta “falenderojë” për “ftimin e këtyre luftëtarëve në vendin tonë”, sepse “përndryshe, pa ne, ata do të janë infiltruar atje”./UBTNews/