Zëvendëspresidentja e SHBA-së, Kamala Harris, ishte në Korenë e Jugut të enjten për të vizituar kufirin e fortifikuar me Veriun e armatosur me armë bërthamore, në një udhëtim që synon forcimin e aleancës së sigurisë me Seulin.
Duke folur përpara takimit të saj me presidentin e Koresë së Jugut, Yoon Suk-yeol, Harris tha se aleanca e vendeve ishte “një shtyllë e sigurisë dhe prosperitetit në gadishullin Korean”.
“Unë jam këtu për të përforcuar forcën e aleancës sonë dhe për të forcuar punën tonë së bashku”, shtoi ajo.
Uashingtoni stacionon rreth 28,500 trupa në Korenë e Jugut për të ndihmuar në mbrojtjen e saj nga Veriu dhe aleatët po kryejnë një stërvitje të përbashkët detare në shkallë të gjerë këtë javë.
Udhëtimi i Harris në Zonën e Çmilitarizuar (DMZ) ka të ngjarë të zemërojë Phenianin, i cili e quajti Kryetaren e Dhomës së Përfaqësuesve të Shteteve të Bashkuara Nancy Pelosi si “shkatërruesen më të keqe të paqes ndërkombëtare” kur ajo vizitoi kufirin në gusht.
Harris, gruaja e parë nënpresidente e Amerikës, do të takohet gjithashtu me ato që Shtëpia e Bardhë i cilëson “gra udhëheqëse novatore” të Koresë së Jugut, për të diskutuar çështjet e barazisë gjinore./UBTNews/