Pas protestës dhe shprehjes së pakënaqësisë lidhur me shtesat e pagave dhe rrezikshmërisë në punë nga Njësia Speciale Intervenuese e policisë dhe ajo për Eksploziv dhe Deminim, sot (e enjte) do të protestojë edhe Njësia Speciale Operative.
Protesta do të mbahet brenda zyrave, për dallim nga dy njësitë e tjera elitare që protestën e bënë para objektit të qeverisë.
Të mërkurën, pjesëtarët e njësive elitare të policisë kërkuan nga kryeministri i Kosovës, Albin Kurti, që t’i marrë seriozisht kërkesat e tyre për shtesat e rrezikshmërisë.
Ministri i Punëve të Brendshme, Xhelal Sveçla, ka shkruar se mbështetja për Policinë e Kosovës, nuk ka munguar. Sipas Sveçlës, të ardhurat e njësive speciale kanë arritur deri në 2 mijë e 200 euro gjatë këtij viti.
Po ashtu edhe kryeministri, Albin Kurti, tha se pajisjet e tyre kapin vlerën e 10 mijë eurove.