Kërkesat e amerikanëve për pilula aborti nga jashtë Shteteve të Bashkuara janë rritur që nga vendimi i Gjykatës së Lartë të SHBA-së verën e kaluar për të përmbysur të drejtën mbarëkombëtare për procedurën e abortit, sipas një studimi të botuar këtë javë.
Studiuesit, puna e të cilëve u botua në revistën mjekësore JAMA, analizuan numrin e kërkesave të paraqitura në shërbimin e telemjekësisë Aid Access, i cili shpërndan pilula aborti nga jashtë në 30 shtete të SHBA-së.
Aid Access u krijua qëllimisht për të ndihmuar gratë të “menaxhojnë vetë” abortet e tyre në shtëpi, duke anashkaluar ndalimet lokale ose barriera të tjera.
Pas vendimit të diskutueshëm të Gjykatës së Lartë në fund të qershorit, shumë shtete të udhëhequra nga republikanët kufizuan ose ndaluan plotësisht abortet.
Sipas studimit, Aid Access pranoi mesatarisht 83 kërkesa në ditë përpara vendimit të Gjykatës së Lartë nga 30 shtetet në të cilat operon.
Por në dy muaj më pas, ky numër u hodh në 213 në ditë – një rritje prej rreth 160 përqind.
Në proporcion me numrin e grave në çdo shtet, rritja e kërkesave për qasje në ndihmë ishte më e larta në Luiziana, Mississippi, Arkansas, Alabama dhe Oklahoma – vende të cilat të gjitha ndaluan plotësisht abortet.
Në shtetet që i shpallën të jashtëligjshëm abortet, “kufizimet aktuale ligjore” u përmendën si motivimi i grave për përdorimin e shërbimit në rreth 62 për qind të rasteve pas vendimit të Gjykatës së Lartë, krahasuar me 31 për qind më parë.
Në 100 ditët pas vendimit të Gjykatës së Lartë, të paktën 66 klinika ndaluan kryerjen e abortit, sipas një raporti në fillim të tetorit nga Instituti Guttmacher./UBTNews/