Përkeqësohet situata e shëndetit mendor ne Evropë. Më shumë se 1 në çdo 6 persona vuan nga të tilla shqetësime, ku në një popullsi prej rreth 447 milionë banorë, 87 milionë kanë një problem të tillë. Jo vetëm, por edhe kostot e mosveprimit përllogaritet të jenë 600 miliardë euro çdo vit.
Këto janë statistikat e bëra të ditura nga Komisioni Evropian, ku theksohet se duhet një strategji e mirëfilltë, pasi pas pandemisë situata në kontinentin tonë është në përkeqësim të mëtejshëm.
Dhe për më tepër, shkaku i dytë i vdekjeve te të rinjtë është pikërisht vetëvrasja, çka duhet të vë në alarm të gjithë shoqërinë dhe autoritetet.
Por edhe në nivel global vërehet i njëjti trend. Duke cituar raportin e fundit të Organizatës Botërore të Shëndetësisë, që është edhe më i mirëhartuari dhe i ploti që nga vitit 2000, rezulton se mbi 1 milliard njerëz vuajnë nga shqetësime mendore.