Vështirësitë ekonomike të Pakistanit nuk tregojnë shenja të rënies në vitin 2023.
Kombi i Azisë Jugore njoftoi të martën një plan të ri të ruajtjes së energjisë pasi ekonomia e tij e brishtë po vazhdon të përballet me sfida të shumta. Qeveria ka urdhëruar që të gjitha marketet të mbyllen deri në orën 20:30 dhe restorantet deri në orën 22:00. Këto masa do ta ndihmojnë vendin të kursejë 62 miliardë rupi pakistaneze (274 milionë dollarë).
Kryeministri Shehbaz Sharif ka urdhëruar gjithashtu të gjitha departamentet federale të reduktojnë konsumin e energjisë me 30%. Vendi është në mes të një krize të rëndë energjetike dhe është shumë i varur nga karburantet e importuara.
Njoftimi vjen në një kohë kur rezervat valutore të Pakistanit janë në nivele alarmante të ulëta. Në muajin dhjetor, rezervat totale likuide valutore të Pakistanit ishin 11.7 miliardë dollarë, që është gjysma e shumës që kishte në fillim të vitit të kaluar, sipas Bankës Qendrore./UBTNews/