Më shumë se 80 civilë u vranë në një sulm nga grupi i armatosur CODECO në një grup fshatrash në Republikën Demokratike lindore të Kongos në fillim të kësaj jave, tha misioni paqeruajtës i OKB-së MONUSCO.
Numri i ri i vdekjeve tejkalon shumë vlerësimin e mëparshëm prej të paktën 51 personave të vrarë, i cili u nda nga autoritetet lokale menjëherë pasi sulmi ndodhi të hënën mbrëma në territorin Djugu, në provincën Ituri, raportoi Reuters.
MONUSCO tha se kishte vendosur paqeruajtës për t’u përballur me sulmuesit sa më shpejt të jetë e mundur, por tha se përdorimi i armëve të ftohta në vend të armëve të zjarrit vonoi reagimin e tyre.
Kur paqeruajtësit mbërritën në vendngjarje, grupi “për fat të keq tashmë kishte vrarë më shumë se 80 civilë, kishte vënë zjarrin shtëpive dhe kishte përhapur panik në mesin e popullatës”, tha misioni në një deklaratë.
CODECO është një nga milicitë e panumërta që luftojnë për tokën dhe burimet në Kongon lindore.
Ai sulmon shpesh kampet e refugjatëve, numri i të cilëve është rritur pas përparimit të fundit të rebelëve M23 të mbështetur nga Ruanda.
M23 ka lëvizur në jug që kur pushtoi qytetin më të madh të Gomës në Kongon lindore në fund të muajit të kaluar, dhe në ditët përpara kapjes së qytetit, rreth 3,000 njerëz u vranë, tha OKB.