Një raport i OKB-së ka treguar se prodhimi i brendshëm bruto u tkurr me katër për qind në Bregun Perëndimor dhe Gaza në muajin e parë të luftës, duke dërguar mbi 400 mijë njerëz në varfëri.
Hamasi, i cili e sundon Gazën, nisi një sulm të befasishëm ndaj Izraelit më 7 tetor, duke vrarë rreth 1 mijë e 400 njerëz, kryesisht civilë, dhe duke rrëmbyer rreth 240 të tjerë.
Më shumë se dy të tretat e popullsisë prej 2.3 milionë banorësh të Gazës janë larguar nga shtëpitë e tyre qëkur Izraeli nisi javë të tëra sulmesh ajrore intensive të ndjekura nga një operacion tokësor i vazhdueshëm, duke u zotuar të zhdukë Hamasin.
Vlerësimi i shpejtë i pasojave ekonomike të luftës së Gazës i lëshuar nga Programi i Zhvillimit i OKB-së dhe Komisioni Ekonomik dhe Social i OKB-së për Azinë Perëndimore ishte raporti i parë i OKB-së që tregonte ndikimin e konfliktit.
Nëse lufta vazhdon për një muaj të dytë, OKB-ja parashikon që PBB-ja palestineze, e cila ishte 20.4 miliardë dollarë para fillimit të luftës, do të bjerë me 8.4 për qind, një humbje prej 1.7 miliardë dollarësh.
Dhe nëse konflikti zgjat tre muaj, PBB-ja palestineze do të bjerë me 12 për qind, me humbje prej 2.5 miliardë dollarësh dhe më shumë se 660 mijë njerëz të shtyrë në varfëri, raporton “The Times of Izrael”.
Ndihmës Sekretari i Përgjithshëm i Programit të Zhvillimit të OKB-së, Abdallah Al Dardari, tha në një konferencë shtypi se një humbje prej 12 për qind e PBB-së në fund të vitit do të ishte “masive dhe e paprecedentë”.
Për krahasim, thotë ai, ekonomia siriane humbte 1 për qind të PBB-së së saj në muaj në kulmin e konfliktit të saj dhe Ukrainës iu deshën një vit e gjysmë luftime për të humbur 30 për qind të PBB-së së saj, një mesatare prej rreth 1.6 për qind një muaj.