Rreth dy të tretat e refugjatëve nga Ukraina presin të qëndrojnë në vendet e tyre pritëse derisa armiqësitë të zvogëlohen dhe situata e sigurisë të përmirësohet pas pushtimit të Rusisë, ka zbuluar një studim i agjencisë së refugjatëve të Kombeve të Bashkuara UNHCR.
Shumica e refugjatëve nga Ukraina, kryesisht gra dhe fëmijë, shpresojnë të kthehen në shtëpi përfundimisht, sipas anketës me rreth katër mijë e 900 njerëz nga Ukraina që tani jetojnë në Republikën Çeke, Hungari, Moldavi, Poloni, Rumani dhe Sllovaki. Sondazhi është kryer nga mesi i majit deri në mes të qershorit.
UNHCR thotë se më shumë se 5.6 milionë refugjatë janë regjistruar tani në të gjithë Evropën, me afro 8.8 milionë njerëz që kanë kaluar nga Ukraina dhe afro 3.3 milionë janë kthyer sërish që nga pushtimi rus më 24 shkurt.
“Ata janë të shqetësuar për t’u ribashkuar me miqtë dhe familjen dhe shqetësohen për ata që kanë mbetur prapa. Shumica duan të presin derisa armiqësitë të jenë qetësuar“, thuhet në raportin e publikuar të mërkurën.
Nga ata që kërkonin të ktheheshin, 40% e kishin planifikuar ta bënin këtë në muajin e ardhshëm, tha UNHCR, duke shtuar se një përqindje më e lartë e refugjatëve nga kryeqyteti Kiev dhe zonat në perëndim po planifikonin të ktheheshin sesa ata që mbërritën nga lindja dhe veriu. /UBTNews/