Drejtori i Përgjithshëm i Organizatës Botërore të Shëndetësisë (OBSH), Tedros Adhanom Ghebreyesus tha se vendimet e donatorëve kryesorë për të pezulluar fondet për furnizuesin më të madh të ndihmës humanitare – UNRWA, “do të ketë pasoja katastrofike për popullin e Gazës”.
Në një konferencë për media ai kërkoi që vendimet të rishqyrtohen, teksa shtoi se asnjë organ tjetër “nuk ka kapacitetin për të ofruar shkallën e ndihmës për të cilën 2.2 milionë njerëz në Gaza kanë nevojë urgjente”.
Të paktën 17 vende kanë njoftuar se do të pezullojnë fondet për agjencinë e OKB-së qëkur Izraeli ngriti akuza se dhjetëra punonjës të UNRWA-s janë të përfshirë në sulmin e 7 tetorit. Disa nga donatorët më të mëdhenj të UNRWA-s si SHBA, Britania e Madhe dhe Gjermania janë ndër shtetet që kanë pezulluar fondet./UBTNews/