Dy raste të dhunimit janë regjistruar gjatë 24 orëve të fundit në Kosovë, ku Policia e Kosovës ka ndërhyrë dhe ka arrestuar dy persona të dyshuar për këto krime.
Një rast ka ndodhur në Obiliq, ku më 25 shkurt të këtij viti, një person dyshohet se ka kryer veprën penale të dhunimit. Policia e Kosovës ka arrestuar të dyshuarin, ndërsa me vendim të prokurorit, ai është dërguar në mbajtje. Detajet shtesë mbi këtë rast nuk janë bërë të ditura.
Një tjetër rast është regjistruar në Malishevë, ku një person është arrestuar nën dyshimin se ka dhunuar viktimën femër, me të cilën ai ka qenë në lidhje. Pas intervistimit, i dyshuari është dërguar në mbajtje me vendim të prokurorit. Sipas njoftimit të policisë, ngjarja ka ndodhur më 4 mars 2025, dhe hetimet për të dy rastet janë duke vazhduar.
Policia ka theksuar se të dyshuarit janë arrestuar dhe se hetimet janë në zhvillim e sipër për të sqaruar plotësisht rrethanat e këtyre veprave penale./UBTNews/