Kancelari austriak, Karl Nehammer pas takimit me presidentin rus, Vladimir Putin në Moskë javën e kaluar, deklaroi se Putin është në “logjikën e tij të luftës” kur bëhet fjalë për Ukrainën. Nehammer në një intervistë për NBC deklaroi se Putin po mendon se është duke e fituar luftën.
Kancelari austriak është lideri i parë evropian që u takua me Putinin në Moskë qëkur nisi pushtimi rus i Ukrainës më 24 shkurt.
Para se të shkonte në Moskë, Nehammer vizitoi qytetin Bucha në Ukrainë, ku u kryen tortura dhe vrasje pas tërheqjes së forcave ruse.
Nehammer tha për “Meet the Press” se ai u përball me Putinin lidhur me atë që ka parë në Bucha dhe “nuk ishte një bisedë miqësore”./UBTNews/