Gratë nuk do të lejohen më të ndjekin mësimet ose të punojnë në Universitetin e Kabulit “derisa të krijohet një mjedis islamik”, njoftoi sekretari i ri i shkollës i caktuar nga talebanët dje, transmeton UBT News.
“Përderisa mjedisi i vërtetë islam nuk sigurohet për të gjithë, gratë nuk do të lejohen të vijnë në universitete ose të punojnë. Islami së pari”, shkroi Mohammad Ashraf Ghairat në llogarinë e tij zyrtare në Twitter.
“Për shkak të mungesës së pedagogëve femra, ne jemi duke punuar në një plan që pedagogët meshkuj të jenë në gjendje t’i mësojnë studentet femra nga një perde në klasë. Në këtë mënyrë do të krijohej një mjedis islamik për studentët femra që të arsimohen”, ka shkruar ai në Twitter.
Emërimi i tij si kancelar i Universitetit të Kabulit nga talebanët u prit me një stuhi kritikash për mungesën e kredencialeve të tij. Ghairat kundërshtoi këto vlerësime në Twitter, duke thënë se e shihte veten “plotësisht të kualifikuar për të mbajtur këtë karrige”.
Talibanët, të cilët sunduan mbi Afganistanin nga viti 1996 deri në 2001, historikisht i kanë trajtuar gratë si qytetare të klasit të dytë, duke i nënshtruar ato ndaj dhunës, martesave të detyruara dhe një pranie gati të padukshme në vend, përcjell UBT News.
Pasi rimarrën kryeqytetin, Kabul, në gusht, udhëheqja e talebanëve pretendoi se nuk do të zbatonte kushte të tilla këtë herë në pushtet. Por ato premtime nuk janë realizuar.
Mungesa e ndonjë përfaqësueseje femër nga qeveria e tyre e sapoformuar dhe një zhdukje pothuajse brenda natës e grave nga rrugët e vendit, ka çuar në shqetësime të mëdha për atë që do të ndodhë më pas për gjysmën e popullsisë së saj.
Militantët në disa raste i kanë urdhëruar gratë të largohen nga vendet e tyre të punës, dhe kur një grup grash protestuan kundër shpalljes së qeverisë krejt mashkullore në Kabul, luftëtarët talebanë i rrahën me kamxhik dhe shkopinj./CNN/UBTNews/