Nënat e reja, Yana dhe Yaroslava, nuk duan të largohen nga Rusia me djalin e tyre 6-vjeçar. Por ato kanë frikë se një ligj i ri i ashpër kundër homoseksualëve i miratuar nga ligjvënësit rusë do t’u lërë atyre pak mundësi për zgjedhje.
“Ne jemi qytetarë si gjithë të tjerët. Ne paguajmë taksa, mbështesim bamirësi. Por qeveria po bën gjithçka për të na detyruar të largohemi nga vendi. Sinqerisht, është e frikshme të qëndrosh”, tha Yaroslava për CNN.
Dhoma e Lartë e Parlamentit të Rusisë dha miratimin e saj përfundimtar në fund të nëntorit për një paketë të re legjislative që forcon një ligj ekzistues mbi të ashtuquajturën “propagandë LGBTQ” dhe ai u nënshkrua të hënën nga Presidenti Vladimir Putin.
Kufizimet e shtuara mbi “propagandën” që shihen si promovimi i “marrëdhënieve seksuale jo-tradicionale dhe/ose preferencave” mbartin dënime të rënda – një veprim që aktivistët thonë se do t’i vendosë komunitetet LGBTQ nën një kontroll dhe mbikëqyrje të shtuar.
Ndërsa Kremlini përgatitej të finalizonte zgjerimin e ligjit diskriminues kundër homoseksualëve të vitit 2013, anëtarët e komunitetit LGBTQ në Rusi i thanë CNN se kishin frikë nga e ardhmja e pasigurt që po i pret.
“Ne jemi kategoria më e cenueshme brenda LGBT. Ne kemi një fëmijë dhe ata (autoritetet ruse) mund të na bëjnë presion”, tha Yaroslava./UBTNews/