Jordania dhe agjencia e Kombeve të Bashkuara për refugjatët palestinezë kanë akuzuar Izraelin se synon të pastrojë Gazën nga populli i saj përmes një “ofensive pa dallime dhe brutale” në përgjigje të sulmit të Hamasit që nisi më 7 tetor.
Në Forumin e Dohas që u mbajt në Katar të dielën, Ministri i Jashtëm i Jordanisë, Ayman Safadi, tha se Izraeli po zbaton një politikë e cila po i largon palestinezët nga Gaza përmes luftës që sipas tij e plotëson “përkufizimin ligjor të gjenocidit”.
“Ajo çfarë po shohim në Gaza nuk është vetëm vrasja e njerëzve të pafajshëm dhe shkatërrimi i jetës së tyre, por një përpjekje e vazhdueshme për ta pastruar Gazën nga njerëzit e saj. Bota ende nuk ka arritur… te një kërkesë e qartë për t’i dhënë fund kësaj lufte, një luftë që është brenda përkufizimit ligjor të gjenocidit”, deklaroi ai.
Safadi tha se qëllimi i Izraelit për të shkatërruar Hamasin u fsheh nga shkalla e shkatërrimit në mesin e civilëve të Gazës, që sipas tij po bëhet pa dallim./UBTNews/