Ministri i Jashtëm iranian, Hossein Amirabdollahian do të shkojë sot në Moskë, ka thënë Ministria e Jashtme e Iranit, disa ditë pasi negociatat për një marrëveshje bërthamore me Iranin ngecën – mes kërkesave të reja ruse, përcjell UBT News.
“Rusia i ka bërë kërkesat e saj zyrtare me zë të lartë dhe të qartë dhe kjo duhet të diskutohet mes të gjitha palëve në marrëveshjen e vitit 2015, si të gjitha kërkesat që janë paraqitur nga palët tjera”, u tha gazetarëve zëdhënësi i Ministrisë së Jashtme, Saeed Khatibzadeh.
Bisedimet mujore në Vjenë i kanë sjellë fuqitë e mëdha afër rinovimit të Planit të Përbashkët Gjithëpërfshirës të Veprimit (JCPOA) të vitit 2015 për rregullimin e programit bërthamor të Iranit.
Por negociatat u ndërprenë pasi Rusia më 5 mars kërkoi garanci që sanksionet perëndimore të vendosura pas pushtimit të Ukrainës nuk do të dëmtonin tregtinë e saj me Iranin.
“Çështjet dhe pikat e mbetura mes nesh dhe SHBA-së kanë nevojë për vendime politike në Uashington”, përfundoi Khatibzadeh./UBTNews/