Kryeministri i Maqedonisë së Veriut, Hristijan Mickoski, shpreson se procesi i integrimeve evropiane të vendit do të zhbllokohet me mbështetje të madhe nga Hungaria. Kjo deklaratë erdhi gjatë një konference të përbashkët për shtyp me kryeministrin hungarez, Viktor Orban, në Budapest.
Mickoski theksoi se objektivi strategjik i Maqedonisë është që të bëhet pjesë e familjes evropiane, një qëllim që sipas tij është i merituar që shumë kohë më parë, por ende mbetet një proces i ngadalshëm. Ai theksoi se qytetarët e Maqedonisë kanë paguar një çmim të madh për këtë objektiv, dhe shpjegoi se procesi aktual i integrimit nuk ka ndryshuar shumë krahasuar me situatën që ka ekzistuar para 20 vitesh.
Kryeministri i Maqedonisë e cilësoi si një sfidë të madhe procesin e “bilateralizimit të negociatave”, duke shtuar se ai nuk është thjesht një proces i “evropianizimit” të negociatave, por një angazhim më i thellë që kërkon angazhim të vazhdueshëm.
Ai shprehu besimin se me mbështetje të fuqishme nga Hungaria, Maqedonia mund të vazhdojë përpara dhe të fillojë negociatat për anëtarësimin në Bashkimin Evropian. Mickoski shprehu shpresën se procesi do të zhbllokohet dhe vendi do të mund të përmbushë kriteret e vërteta të Kopenhagës për të përfunduar negociatat dhe për të u bërë pjesë e Bashkimit Evropian./UBTNews/
