Presidenti i Republikës, Ilir Meta, priti në një takim Zëvendëskryeministren dhe Ministren e Punëve të Jashtme dhe të Diasporës së Republikës së Kosovës, znj.Donika Gërvalla.
Pasi e uroi Kosovën për zhvillimin me korrektësi të zgjedhjeve lokale, Meta u shpreh se të dyja vendet duhet të heqin çdo pengesë për përmirësimin e jetës së qytetarëve.
“Zhvillimi i zgjedhjeve lokale, nxjerrja, si dhe pranimi i rezultateve paraprake nga të gjitha palët në proces është një shembull për të gjithë rajonin se si duhet të zhvillohen dhe administrohen zgjedhjet.
Theksova nevojën që Shqipëria dhe Kosova të bashkëpunojnë edhe më ngushtësisht në lehtësimin e çdo pengese, që ekziston në zhvillimet në fushën politike, kulturore, ekonomike, tregtare dhe të gjitha sferat e tjera të jetës.
Të dyja vendet tona, së bashku duhet të punojnë për forcimin dhe konsolidimin e subjektivitetit ndërkombëtar të Kosovës, si dhe për përshpejtimin e proceseve të integrimeve europiane”, shkruan presidenti.