Kryetari i Partisë Demokratike të Kosovës, Memli Krasniqi ka shprehur në seancën e Kuvendit konsideratë për deputeten e deritashme të Kuvendit nga radhët e Vetëvendosjes, Vasfije Krasniqi e cila një ditë më parë njoftoi se ka dhënë dorëheqje nga posti i saj për arsye shëndetësore.
“Para se ta filloj fjalën time dëshiroj që ta shpreh konsideratën më të thellë për deputeten e deritanishme Vasfije Krasniqin e cila dha dorëheqje nga pozita e deputetes edhe në emrin tim dëshiroj t’i uroj shëndet dhe suksese ka qenë nder për Kuvendin e Kosovën me pas në mesin tonë një deputete të fuqishme si ajo”, është shprehur kryetari i PDK-së.
Por, për deputeten e deritashme të Kuvendit të Kosovës, nuk ka folur as kryeministri dhe kryetari i Vetëvendosjes Albin Kurti por as kryeparlamentari Glauk Konjufca apo shefja e Grupit Parlamentar Mimoza Kusari-Lila.