Udhëheqësja nacionaliste Giorgia Meloni, e cila do të bëhet kryeministrja e ardhshme e Italisë, ka premtuar mbështetjen e saj të plotë për Kievin, pasi mori urimet nga presidenti ukrainas Volodymyr Zelensky për fitoren e saj në zgjedhje.
Në një postim në Twitter të martën, një ditë pasi Meloni dhe aleatët e saj të krahut të djathtë fituan një shumicë komanduese parlamentare, Zelensky tha se mezi priste “bashkëpunim të frytshëm me qeverinë e re italiane“.
Meloni u përgjigj menjëherë: “I dashur Zelensky, ju e dini që mund të llogarisni në mbështetjen tonë besnike për kauzën e lirisë së popullit ukrainas. Qëndroni të fortë dhe mbajeni besimin tuaj të palëkundur!” shkroi ajo në Twitter.
Meloni ka qenë një nga të paktët liderë politikë italianë që ka miratuar me gjithë zemër vendimin e kryeministrit në largim Mario Draghi për të dërguar armë në Ukrainë, edhe pse ajo ishte në opozitë me qeverinë e tij.
Në të kundërt, dy aleatët politikë të Melonit, Lidhja dhe Forza Italia, të cilat ishin të dyja në koalicionin e Draghit, kanë qenë shumë më ambivalente, duke reflektuar lidhjet e tyre historikisht të ngushta me presidentin rus Vladimir Putin.
Duke nënvizuar thellësinë e këtyre lidhjeve, udhëheqësi i Forza Italia, Silvio Berlusconi tha javën e kaluar se Putin ishte “shtyrë” në pushtimin e Ukrainës dhe kishte dashur të vendoste “njerëz të denjë” në krye të Kievit. /UBTNews/