Të paktën 18 persona u vranë dhe të paktën 23 u plagosën të enjten kur një autobus që transportonte emigrantë të huaj dhe vendas u rrëzua në një luginë në veriperëndim të Meksikës, thanë autoritetet.
Tre të mitur ishin midis të vdekurve, njoftoi agjencia e mbrojtjes civile në shtetin Nayarit.
Autobusi kishte 40 persona në bord.
“Shumica e pasagjerëve janë të huaj dhe me origjinë nga vende të tilla si India, Republika Domenikane dhe nga kontinenti afrikan, ndër të tjera, disa prej të cilëve po shkonin në Tijuana për të kaluar në Shtetet e Bashkuara”, tha agjencia e mbrojtjes civile.
Aksidentet vdekjeprurëse rrugore janë të zakonshme në Meksikë, zakonisht për shkak të shpejtësive të larta, kushteve të këqija të automjeteve ose lodhjes së shoferit./UBTNews/